其實我唔明咩叫［急讓］，本來諗住睇完齣戲我會參透到呢兩個字的玄機，但最後我睇唔透，亦唔知呢套戲搞乜。
故事大綱：
項少龍（張家輝飾）為左達到女友（胡杏兒飾）的結婚要求，決定與沙律（鄭秀文飾）、無血緣的繼女（Angelababy飾）以及公司有錢仔實習生（黃初飾）合資購入豪宅炒賣，希望以一年時間將身家翻數倍，到時買到千呎豪宅同女友結婚。最後，因樓市被政府打壓，導致炒樓計劃未能如願以償外，仲發生唔小插曲。
上左神枱的張家輝而家都好少再拍喜劇，相隔多年再拍喜劇同以前演繹化骨龍已經係完全唔同層次。而家唔使好似以前做得咁浮誇咁引人笑：捉住個節奏，簡單幾個動作、對白同神情已達到效果。
相反，鄭秀文仲用緊佢廿年前的演戲方法黎演，如果拍住劉德華咁實無問題。好可惜，佢今次的對手張家輝，完全係由頭帶到尾，女主角都白白淪為配角。同時，唔入場都唔知原來有Angelababy 參與。
導演兼編劇卓韻芝將香港時事例如樓市、港女話題等合併成一齣戲，內容、配角、串星都好充足，但導演為左要成個故事緊湊，似乎剪得太多戲，最後所有劇情就好似好趕頭趕命咁，兩頭唔到岸。尤其項少龍同沙律的感情線，睇完我都同下圖劇照的表情一樣。
總括黎講，如果你係張家輝瘋狂粉絲，可以入場一睇。否則，大家可以上論壇睇香港真人真事話題，個ｄ感情背景至少比香港愛情電影黎得真實同細膩、網民回應樓市話題更真切抵死。
電影評分: 5/10
聲明: 本文並無任何商業利益成份，純綷個人感想。
相片來源來自YAHOO電影劇照
伸延參考:
- 香港預告片：
2. 睇返報紙的確剪左唔少戲：
