《分手100次 》

最近無乜香港愛情小品電影，突然彈出鄭伊健同周秀娜合拍的愛情片，預告片亦拍得好吸引。既然餓左香港愛情片咁耐，好快就入左去睇，畢竟我係從未睇過娜姐的戲。(唔...娜姐的內衣廣告就睇得多....)

電影上半場要交代故事情節，有搞笑有靚女有性感有抵死，輕輕鬆鬆過左四十五分鐘後，電影下半場就開始沉重的劇情，亦悶足下半場 (結局更加O晒咀)。

故事都係講娜姐做港女，開口埋口講分手，要面子要贏要威要迫婚；伊健就做返十幾年演開的大細路，女的想結婚，男的未定性，完全典型香港實例，最後點解決? 最老套又最真實個句:一段長久的愛情，當中都係包括忍耐同遷就，能夠忍得到就一世，忍唔到就bye bye。

全片情節其實好單薄(甚至有D鬆散)，有機會可以順延的情節無好好發揮同交代，例如萊萊(溫心飾)同Roy(林德信飾)的一對；關係完結左，想講萊萊同伊健曖昧又唔係，講其他道理又唔係，浪費左一對角色。

反而全場最搶鏡一定係瑞哥(王菀之飾)，由電視劇《老表，你好嘢》開始，到今次的演出都係充滿驚喜，而且王菀之開始掌握到做喜劇的節奏，帶動到成齣戲的輕鬆氣氛，簡直係亮點之一。

反觀身為女主角，娜姐就演到有點到喉唔到肺，偒感時咇到眼淚但觸動唔到人；要甜到入心時把聲又太老，但勝在夠青春，淡妝上場仍然清秀可人；伊健就貫徹十幾年大細路本性，扮演手到拿來的角色。十年前睇伊健做《我老婆唔夠秤》、《後備甜心》，到十年後個樣仲KEEP到之餘，仲仍然同後生女拍戲都仲夾到，男人果然好come老。

雖然主線比較失望，但配角線(甚至客串影星)就充滿驚喜。除左王菀之，仲有參與過《潮性辦公室》的韋羅莎亦值得大家留意，心水清的觀眾應該會留意到佢分演左兩個性格完全唔同的配角(相隔不足五鐘)，尤其扮演印藉女，全場都捧腹大笑。

總括黎講，如果你想睇娜姐性感演出、床上戲的話，呢齣戲係唔會有。反而輕輕鬆鬆笑下過返個半鐘，呢齣應該滿足到你。

電影評分: 6.5/10

聲明: 

本文並無任何商業利益成份，純綷個人感想。

伸延參考:

1. 做得好吸引的預告片

     

2. 第一次見到韋羅莎係來自《潮性辦公室》，睇完係完全係笑到碌地。(同送水輝哥有得揮)