Movie Mellee :《等一個人咖啡》

一開始無留意的一齣戲；少宣傳、少話題、無注目的面孔、無熟悉的演員 (嘩! 周慧敏你都話識?? OK... 我知佢係食左防腐劑的香港女明星) 但呢齣戲係香港真係好無聲無色咁上左畫。

               

後來陸陸續續聽到大家將佢同 < 那些年，我們一起追的女孩 > (後文以 <那些年> 簡稱) 比較；當然啦，同一部咁大賣的神戲比較，實好容易輸到貼地。不過，慕著九把刀之名同台灣青春片，決定入場睇一睇佢。

故事大綱 :

剛踏入大學的 freshmen 思瑩（宋芸樺 飾），因一次交通意外遇見澤于（張立昂 飾）並對其一見鍾情，從而入左咖啡店打工。中途認識沖咖啡高手阿不思（賴雅妍 飾）、咖啡店老闆娘（周慧敏 飾）、大學傳說人物阿拓學長（布魯斯 飾）、前電影導演的中餐廳老闆暴哥（李㼈 飾）以及洗衣店老闆娘金刀嬸（藍心湄 飾）；電影一直環繞他們講述幾個不同的愛情故事。

全片一百二十分鐘，電影上半場逐一交代戲中每位角色的背景，節奏較慢同較為平淡，好彩當中加插些少笑位、打鬥場面；下半場情節開始緊湊，中途亦聽到唔少觀眾擦開紙巾的聲音 (當時我都有眼濕濕)，全片笑中有淚。老實講，平時坐足兩粒鐘真係會叫晒救命仲會係咁睇錶，之但係呢齣完完全全唔會覺得有悶場。原因當然係劇本好豐富，每個故事、角色、對白導演都好有心機編排。單係呢一點我已經非常欣賞。

                

九把刀好大膽地起用新人出演男女主角，不過睇起上黎絶對唔似第一次演出，情感自然流露。女主角宋芸樺不是很艷麗、香港人印象中的台妹，不過絶對夠青春可人，很平凡但好真實；男主角布魯斯兩個酒粒絶對令傻更更角色生色不少。
                       

                     

最令人期待的角色莫過於咖啡店老闆娘周慧敏，雖然戲中擔當客串角色，但卻是本片中的靈魂人物，主角的故事都圍繞咖啡店同老闆娘的背景。周慧敏一出場已經渾身是戲，對眼好似識講野咁，眼神充滿哀傷；之不過哀傷還哀傷，佢演繹無所事事的老闆娘的方法，令我聯想到佢好似日日飲完酒hangover咁；當然這只是無關痛癢的小瑕疵。

                 

我衷心好欣賞九把刀能夠創作出咁有青春活力同創意的愛情片，橋段好特別，至今仍刻印係腦海中。雖然同行友人話劇情、對白老套兼感動唔到佢；但對我而言，呢齣戲絕對能夠感動到我。

好多人都將《等一個人咖啡》同《那些年》比較，其實好唔公平；始終《那些年》主角們交代足足十年內的事，而且都半真人真事，觀眾當然睇得投入；但《等一個人咖啡》只係講述大學生涯的故事，當中更加插唔少想天馬行空情節，單係呢點已經無得比。

原著小說係2005年的作品，為左搬上大銀幕當中更改編左唔少情節，想追小說睇的人要注意。

電影評分: 7.5/10

           

聲明: 本文並無任何商業利益成份，純綷個人感想。

              

伸延參考 :

1. 《等一個人咖啡》預告片

2. 睇完呢齣戲，即刻揾返原聲帶聽返帶動觀眾齊心拎紙巾的插曲狂煲 : 林芯儀 < 等一個人 >

3. 片中沖咖啡高手阿不思（賴雅妍 飾），真的超帥對不對!!!!!!!!!! (台腔)
           

         

特意搜查她長髮個樣。。。。。嘩!!!!!!!!!!!!!! 超!!級!!靚!!!!!!!!!

原來賴雅妍之前曾經客串過 <那些年> .....

                         

                               

             
同時，賴雅妍係九把刀第一部電影 <愛到底> 中的女主角；碰巧，《等一個人咖啡》係九把刀第一本出版的小說，很有緣份的說。