《LUCY 超能煞姬》

套戲的中文譯名改得有點伏，本來都無咩興趣睇；但見係性感女神Scarlett Johansson主演，兼且個題材好吸引：女神個腦被瞬間激發至１００％使用。嘩！講到咁堅，無可能唔睇掛。

故事大概講無知的Lucy （Scarlett Johansson飾）誤幫一夜情男友運毒，更被韓國黑幫安排藏毒並運送至其他國家，途中卻意外地吸入大量新型毒品，身體無排斥反而令腦部激發使用量至１００％，之後Lucy就用佢超強的腦與黑幫展開一輪追殺的場面力。

科幻片要拍到人人睇得明，又個個都讚真係好難。始於係描述天馬行空的事，要拎到共鳴唔係一件易事。所以導演都花左唔少心機，係電影入面加插不少學術、紀錄片的畫面，令觀眾睇得明白之餘又容易投入到；同時，最抵讚係導演將畫面編排得唔突兀，呢方面的確令我有好深刻的印象。

戲中片頭以海豚作引喻，當海豚開發到２０％腦部發展運用到聲納時，咁人又可以點運用１００％腦呢？導演都做左功課，引申到Lucy運用到所有能量包括聲能、電磁能，簡單d講，即係做左超人。

眾多影評中，大家都講到呢齣戲有幾神，咩進化論、時間變化、甚至宇宙誕生起源等。恕本人才疏學淺，領悟唔到咩人生大道理之餘，亦同生命時間宇宙產生唔到共鳴。

之但係咁，女神Scarlett Johansson的演技的確無得彈，由無知、驚恐，做到萬事皆知無晒人的感情時，呢下已經值回票價。但打鬥場面同超乎常人的特技，只屬一般吸引。

配角方面，有韓國影帝級人馬崔岷植飾演黑幫大佬，氣勢完全壓得住成個畫面；但最可惜個角色設定限制左佢發揮，只有開場個下先夠爆。

全片約九十分鐘，無論角色演技、特技、拍攝場地都值回票價，雖然片中有些少反駁位，不過尚可接受，值得入場一睇！

電影評分: 7.5/10

聲明: 

本文並無任何商業利益成份，純綷個人感想。

伸延閱讀：
1. 《LUCY: 超能煞姬》香港預告片